智利孖寶 射爆墨西哥

猪拉多纳

美洲盃第2輪分組賽開戰

打針都冇咁快，美洲國家盃A組聽朝就展開第二輪分組賽，其中主辦國智利會迎戰墨西哥。智利首戰鬥厄瓜多爾盡顯霸氣，「進攻孖寶」維達爾同阿歷斯山齊士玩到對手陀陀擰，今場對住缺少防線領袖馬基斯嘅墨西哥，讓一球真係濕濕碎，強捧1.76倍上盤。 （now681台周二早上7:30直播）

智利領隊森柏奧利，早喺揭幕戰硬撼厄瓜多爾之前，就話自己已經度好咗多達18套戰術陣容，嚟到去應付唔同對手。之但係老實講，唔理森帥係咪吹水、到底有幾多招數都好，只要佢安排維達爾同阿歷斯山齊士落場，就已經夠晒「屈機」啦！
A山 維達爾

首戰踢到曉飛

係，雖然智利喺揭幕戰因為緊張，水準未發揮到最好，但呢對喪攻孖寶依然踢到曉飛，頻頻製造到肉攻勢同埋門，經過首戰熱身適應比賽氛圍後，艾蘭古斯、伊斯拿、馬些路戴亞斯同包爾斯亞等極具質素嘅智利國腳，今仗演出應該會淡定得多，只要呢支東道主能夠發揮應有實力，就算對住巴西同阿根廷都有得鍊啦，更何況佢哋聽朝嘅對手只係墨西哥？
馬基斯傷埋

墨西哥超殘陣

講真，墨西哥國家隊本身已經唔係好叻，今屆美洲盃仲夠膽死搵班二打六嚟踢，雖然主帥米基爾靴里拉賽前勁大口氣，話「仙人掌」會以捧盃為目標，又話會從中提拔表現標青嘅國腳，只可惜呢班二線兵始終冇料到，首輪鬥出名作客腳軟嘅玻利維亞，唔單止全場埋門11射得1中，命中率低到冇譜，仲差啲被對手偷雞成功，爭標？咪講笑啦！最大名氣嘅防線領袖馬基斯上場傷出，賽前已講明冇百分百狀態都唔會落場，墨西哥冇埋呢支定海神針壓陣，防線肯定自亂陣腳都似，咁搞法，想唔輸畀智利都幾難啦！（美洲盃A組）