榜首大戰狐狸降魔

猪拉多纳

又到占美華迪ShowTime！

英超今晚爆發「榜首大戰」！今季表現令人眼前一亮嘅李斯特城，將以「一哥」身份主場迎戰曼聯，兩隊分別係目前英超鋒力最強同防守最強球隊，不過所有球迷都睇得出，「狐狸」李斯特城依家愈踢愈有，反而曼聯班球星愈踢愈冇信心，「紅魔鬼」連入波都有難度，更遑論要作客讓人，心水推介1.84倍嘅下盤！

李斯特城今季狀態大勇，13場聯賽只係輸過畀阿仙奴咁大把，王牌射手占美華迪由開季至今已經攻入13球，平均每仗都1球進帳，上場仲追平前曼聯射手雲尼斯達萊連續10場聯賽入波紀錄，認真厲害！呢位英格蘭國腳依家已經踢到上晒身，迪基亞幾好身手都唔救得幾多次啦。
李城入28粒英超最多

李斯特城最恐怖嘅地方，係佢哋唔止靠占美華迪單天保至尊，馬列斯、岡崎慎司、荷西烏路亞、尼高路簡迪都有入波能力，前線速度亦喺英超數一數二，所以暫時以28球成為英超入波最多嘅球隊。領隊雲尼亞里經驗豐富，賽前話唔奢望李斯特城捧盃幫球員減壓，球隊目前表現已超乎期望，球員輕鬆而唔輕敵，自然有超水準發揮啦！
朗尼 馬迪爾死晒火

曼聯雖然爬上聯賽第2位，但全季表現都係負評居多，周中歐聯主場同燕豪芬悶和0:0，又畀球迷插到開花！今晚作客近況大勇嘅李斯特城，領隊尹戈爾都幾頭痕，皆因隊長朗尼狀態低沉，而且佢已經連續4場聯賽無入過波，新星安東尼馬迪爾亦有啲乾塘，連續6場比賽冇波入，咁嘅鋒力仲要讓平半，相信要贏波贏盤都唔係咁易！