些路迪擸蘇足盃安慰獎

港陌

21/05/2011
文： 黃興桂

蘇超冠軍同聯賽盃已落入格拉斯哥流浪手上，死敵些路迪當然不是味兒，今季為免空手而回，點都要擸番隻盃返屋企，而蘇格蘭足總盃就成為些路迪今季唯一錦標希望。




今晚舉行嘅蘇足盃決賽由馬瑟韋爾對些路迪，點計點秤些路迪都高過馬瑟韋爾，加上今次喺中立場進行，馬瑟韋爾偷雞可能性就更低。Peter預計些路迪可大勝一場。




正所謂跌咗個橙都執番個桔，些路迪領隊連儂極有必要贏取蘇足盃向球隊交代。唔好以為大球隊就唔吼盃仔，你睇吓阿仙奴近幾年冇盃落袋，領隊雲格畀人話足咁耐，所以Peter可以肯定些路迪鬥志十足，唔會畀馬瑟韋爾有任何機會。留意到近年對賽些路迪取得五勝，最近一次仲大炒馬瑟韋爾四比○，相信今場盃賽亦唔會例外。（周六晚10時開賽）


NBA熱火趁亂稱霸


另外NBA賽事方面，幾支近年冠軍級球隊包括湖人、塞爾特人、馬刺等都已經出局，Peter就睇好熱火可於大亂局成為今屆NBA盟主，始終有勒邦占士、韋迪、保殊三條煙壓陣，奪冠潛質豐厚。




獨一無二「金句王」，現職有線足球評述員，擁躉眾多。見多識廣、笑看人生，我行我素畀波風格，喺省港澳極受歡迎。




是日金句：NBA新軍並起，熱火三雄可稱王