巫斯義告別戰好路

猪拉多纳

　　每年都會傳出老將巫斯義就嚟退休，呢個消息至少「煲」咗4、5年，但年年都見佢返嚟香港跑馬，好在身手依然在，冇話年紀大，功力退化，只不過，有時真係戰意散漫啲，惹來被圍插。平心而論，巫斯義已經40幾勾，仲可以喺競爭激烈嘅香港，站穩一席位，的確唔容易。

　　跑埋呢次，佢老哥將會結束今季客串期，下季仲嚟唔嚟，到時先再算。睇過佢最近幾年告別戰都有送行馬，唔似係巧合，應該係練馬師有心造就，大家好來好去。既然練馬師們情義咁重，今次巫斯義應該唔會冇着落，手上8匹坐騎，又確係質量兼具，莫講話1W，起個孖都唔係咩難事。

　　花月佳期合拍

　　細心啲望吓巫斯義各場坐騎，好多匹都係有賽績支持，或者係佢騎慣騎熟嘅馬，就好似「綫路財星」，今季經已兩W，都係阿巫操刀，人馬夾慣；「花月佳期」最近1次上名就係喺阿巫手上；尾兩場「高嶺福星」和「金秋」，更加係佢嘅嫡系馬。而呢批馬肯定會留畀下家，佢臨別在即，梗會抱着贏得就贏心態，實行刮多啲獎金。（Jack）