轉倉票勁名列前茅

猪拉多纳

　　今日沙田共有十一場草泥地賽事，睇過隔晚飛數，好多場合都搵唔到重心馬，除咗第四場「兵工闖」嘅獨贏賠率曾得1.9倍，同埋第八場「桃花心」曾得2倍叫做穩陣啲之外，其餘場次好亂，睇嚟爆冷。

　　噚日睇飛嗰陣，發現四匹轉倉初出馬中，有兩匹有早飛眷顧，佢哋分別係第二場「明民天下」及第三場「名列前茅」（見表），先講由蔡廐轉賢廐初出的「名列前茅」。話說呢匹馬隸屬蔡約翰馬房時，跑咗二十一仗都未開到勝門，難怪上仗嘅獨贏賠率有11倍咁多。偏偏今次轉蘇偉賢馬房初出，隔晚就有人落定飛先，獨贏賠率曾得6.5倍，既然有人支持，一於買番啲。再講由葉廐轉李廐初出嘅「明民天下」，呢匹馬上仗17倍，呢期轉倉初出曾得7.4倍，應該係搏殺格。騎師王方面，莫雷拉得1.55倍，都係揀番佢啦。(周仲)