雷神好在有捧盃運

猪拉多纳

　　跑埋呢次賽事，莫雷拉又要停賽，真係唔知佢點可以畀人罰得咁頻密，停賽仲多過食飯，如果保持咁嘅「走勢」，爭冠軍機會似乎微乎其微。

　　不過，佢原來幾有大賽命，早排贏到去杜拜，一晚執咗兩W，另外，今季佢在港已五勝級際賽，其中三場仲係一級賽，今日停賽前一戰，佢喺皇太后紀念盃同冠軍一哩賽都有惡馬，擸晒兩盃唔出奇。

　　今日兩項盃賽，雷神在第八場2400米騎隻「醉必勝」，第九場冠軍一哩賽騎「步步友」，兩駒都係來自盃王大摩個馬房，問心嗰句，「步步友」跑1600米，的而且確係現役最勁嗰幾匹馬之一，再講，雷神同呢匹馬又特別夾，必然發揮出100%水準，梗係大有捧盃機會。

　　論到「醉必勝」機會，係冇咁實牙實齒，但唔好忘記，呢隻馬喺香港唯一一場頭馬就係莫雷拉建功，其他騎師搞唔掂，雷神都有本事贏到，今次人馬再度相逢，又可擦出火花。

　　數埋其他場次，雷神手上仲有好多揀手貨，好似頭場「牛精叻仔」、第五場「勁勢」及第十場「川河首駒」，總之，今期佢手馬唔係講玩。

   (Jack)