印尼露晒底難擋北韓兵團

猪拉多纳

男亞足16強賽事今日續上演多場賽事，其中北韓將會迎戰印尼。北韓男亞足喺分組賽兩戰全勝且錄得零失球，球隊予人感覺有餘未盡，今仗有望贏波再晉一級。印尼男亞足剛戰竟以0比6大敗於泰國男亞足腳下，球隊實力明顯同後者有距離，今仗面對戰鬥力比泰國更強嘅北韓，相信都係凶多吉少，阿謙捧讓球主勝。

（有線64及203台周五晚上7時直播）
徐景進頻入波夠搶鏡

北韓男亞足喺分組賽兩戰皆贏波，雖然未有預期嘅「大炒」場面出現，但球隊贏中國及巴基斯坦都表現得清風送爽，後防更錄得零失球，似乎未有遇到考驗。當中中場徐景進連續兩場都有波入表現搶鏡，至於超齡前鋒李赫哲首場對中國已取得入球，兩人今仗面對印尼脆弱防線大把機會數胡。

印尼男亞足分組賽首兩仗大勝東帝汶及馬爾代夫表現出色，點知上仗對實力分子泰國就原形畢露，慘吞對手6蛋，表現完全唔夠班。印尼今仗面對實力比泰國更強嘅北韓，就算有分組賽入6球嘅萬隆超齡射手施拿加在陣，相信都難以撕破北韓嚴密嘅防線，呢場都係等做「炮灰」，一於捧讓球主勝。