荷華高斯斬草除根

猪拉多纳

19/05/2011
文： 朱楓

荷甲歐霸盃附加賽今晚一觸即發，荷華高斯會先喺主場對格羅寧根。荷華高斯季尾弗到漏，加上今場有射手艾華頓拉莫斯刑滿，相信可輕鬆打響頭炮開出主W！（開賽時間：周五凌晨2:45）




荷甲有兩個附加賽，一個爭歐霸盃資格，另一個就爭護級。今屆歐霸盃附加賽將由第5至第8位球隊參加，雖然荷華高斯係以第8位身份參賽，但近況就係4隊中最弗，對上10場獲8勝2負。正因為前景一片光明，正選門將柏斯維亞早前決定同球會續約至2014年，預計今場有埋今季射入15球嘅巴西射手艾華頓拉莫斯刑滿復出下，必可乘勝追擊再下一城。


格羅寧根射手有離心


對家格羅寧根今季喺荷甲取得第5，可謂全靠射入16球嘅前鋒馬達夫斯，不過呢位斯洛文尼亞國腳自從早前開腔話想離隊後，竟然「hea」踢，對上12場只入得1球咁大把，近仗更不時被貶後備，明顯同球會出現問題，咁唔齊心，作客荷華高斯個仿真草場睇怕凶多吉少！