富明尼斯Vs聖保羅合演入球騷

港陌

21/05/2011


上季巴甲冠軍富明尼斯衞冕第一擊，喺主場鬥傳統勁旅聖保羅，兩隊今季分別為前線加碼，而富明尼斯向來鍾意踢喪攻足球，激戰當前自然係捧入球大。（周一清晨5時30分開賽）




雖然富明尼斯有冠軍教頭拉馬奴離隊，但臨時教練嘅摩里拉仍然沿用上季奪冠的進攻型踢法，他帶隊出戰三場南美自由盃全部開大，新加盟的中場阿羅約，更加先後做過日職同卡塔爾聯賽神射手，因此就算中場迪高有傷今仗未必上陣，都唔使擔心富明尼斯會有攻力問題。


李華度寶刀未老


另方面，經歷上季的失意球季，聖保羅呢支名牌亦決心振作，羅致射手路爾斯法比安奴同李華度等猛將加盟，頭炮撞正上屆盟主自然唔想衰，喺西甲回流嘅法比安奴有幾犀利唔使多講，至於李華度，雖然年近四張，但佢○九年踢賓約哥時仍能成為烏茲別克神射手，絕對老而彌堅，佢嘅經驗加埋法比安奴嘅射術，令聖保羅入波更有保證。